Swartmaanhaar behaal R300 000

'n Rekordprys van R300 000 is vir 'n swartmaanhaarleeu betaal op 'n veiling op Reitz in die Vrystaat. Altesame 32 van die 45 leeus wat aangebied is, is vir R1,1 miljoen verkoop.

Dit was die tweede leeuveiling wat in Suid-Afrika gehou is en die aanbod het bestaan uit diere wat deur mnre. Piet Slabbert en Hansie Wapenaar in hul teelprogram gebruik en geteel is.

Die maanhaar wat die rekordprys behaal het, is vir die teelprogram uit die Mabula-familiegroep by Bela-Bela (Warmbad) gekoop. Drie van sy kleintjies (mannetjies) wat vyf maande oud is, is teen R19 500 elk verkoop en die 'n wyfie uit dieselfde werpsel is vir R10 500 van die hand gesit.

Die naashoogste prys van R150 000 is betaal vir 'n mannetjie wat hulle self geteel het en nog 'n mannetjie wat hulle uit 'n Kalahari-familiegroep gekoop en vir teling gebruik het, het R150 000 gehaal.

Die twee leeuboere het in 1993 met die leeutelery begin. Sewe verskillende bloedlyne word in die teelprogram gebruik om 'n goeie genepoel te vestig.

Die veiling is deur die Afdeling Natuurbewaring sowel as die Nasionale Dierebeskermingsvereniging goedgekeur.