‘Takel Land Bank-bedrog nóú’

Vermeende bedrog by die Land Bank is al vir ’n geruime tyd in die nuus en ’n verdoemende berig in die Sunday Times het veral bedrog by die bank se AgriSEB-fonds weer onder die vergrootglas geplaas. Luidens die berig is miljoene rande wat deur dié fonds vir landbouprojekte gebruik moes word, op duur motors en eiendom vir regeringsamptenare by die bank bestee.

Dié geld is van die voormalige Departement van Landbou en Grondsake aan die Land Bank oorbetaal. Sowat R87,7 miljoen is in 2007 en 2008 van ’n spesiale bankrekening aan landbouprojekte uitbetaal. Mnr. Xolile Ncame, wat kort nadat hy die fonds ’n “geldwassery” genoem het uit sy posisie as die bank se hoof finansiële beampte ontslaan is, sê die geld is in een betaling na die Land Bank oorgeplaas met instruksies oor die ontvangers van die geld.

Luidens ’n artikel op Fin24.com is daar ’n beperking van R43 000 vir toelae aan individue uit die AgriSEB-fonds. Ondanks dié beperking het regeringsamptenare miljoene vir persoonlike gebruik uit die fonds onttrek.

Mnr. Dan Mofokeng, ’n voormalige lid van die Gautengse uitvoerende raad belas met behuising, het na bewering R2 miljoen van die fonds aan ’n huis in Pretoria bestee en ’n luukse Mercedes Benz-motor kontant gekoop. Hy het glo ook R6,5 miljoen van die fonds ontvang as aandeelhouer in ’n landbouprojek in Limpopo.

Mnr. Phil Mohlahlane, waarnemende uitvoerende hoof van die Land Bank toe die betrokke uitbetalings gemaak is, het na bewering geld uit die fonds gebruik om ’n huis in Kyalami vir R2,7 miljoen kontant te bekom. Nóg R6,4 miljoen is glo vir ’n plaas in Limpopo betaal wat aan Mohlahlane se skoonsuster behoort.

Volgens die Demokratiese Alliansie (DA) moet nou daadwerklik iets aan die Land Bank-kwessie gedoen word. Dié party meen dit kom voor asof niks gedoen word om die skuldiges aan te spreek nie, al is daar genoeg bewyse om sake van bedrog aanhangig te maak.

Bron:
Fin24.com
Sunday Times

26 Oktober 2009