Te min mielies vir biobrandstof

Die Suid-Afrikaanse Regering se besluit om ondanks 2007/'08 se rekordoes nie mielies as 'n bron van biobrandstof te gebruik nie, is korrek, sê mnr. Arthur Schroder, Monsanto se hoof vir mielies in Afrika.

Die Regering het dié besluit sowat twee jaar gelede geneem om voedselsekerheid te steun. "Ek dink dit is goed om biobrandstof en hernubare energie te steun, maar Suid-Afrika produseer nie genoeg mielies om biobrandstofproduksie aan te pak nie.

"Daar is tans 'n groot risiko vir die land om biobrandstof van mielies te produseer en ek dink dis wys om te kyk na 'n biobrandstofprogram wat ander produkte gebruik," sê hy.

Die Nasionale Oesskattingskomitee verwag 'n mielie-oes van sowat 11 miljoen ton vir die 2008/'09-seisoen vergeleke met verlede jaar se oes van 12,7 miljoen ton.

Bron:
Fin24.com

18 Junie 2009