Terre’Blanche: Saak uitgestel

Die saak teen die twee vermeende moordenaars van mnr. Eugene Terre’Blanche is vandag in die Ventersdorpse landdroshof tot Woensdag, 14 April, uitgestel berig JacarandaFM. Die twee het Terre’Blanche Saterdagaand na bewering vermoor ná ‘n argument oor geld.

Volgens Kapt. Adele Myburg het Terre’Blanche die verdagtes, een na bewering 15 jaar oud en die ander 28, geld geskuld. Sy liggaam is op ‘n bed in die huis op sy plaas naby Ventersdorp gevind. Hy het weens ernstige kopbeserings gesterf. Myburg sê ‘n knopkierie en ‘n panga is op die toneel gevind.

Getuig in camera
Mnr. Menzi Simelane, die Nasionale Direkteur van Openbare Vervolging het vroeër vandag aan die media gesê die verdagtes sal in camera sal getuig aangesien een van hulle minderjarig is. Luidens ‘n berig op News24.com moes albei verdagtes terselfdertyd verskyn, derhalwe is besluit dat hulle in camera sal getuig.

Intussen het groot onrus glo buite die hof geheers, waar die polisie na bewering wit en swart mense met doringdraad uitmekaar moes hou. Vir meer hieroor, besoek News24.com se webtuiste.

Lees ook die formele klagte wat teen die twee beskuldigedes aanhangig gemaak is.

Bronne:

JacarandaFM

News24.com

6 April 2010