Tesourie beswaar teen Pioneer-skikking

Die Tesourie se ongelukkigheid oor die skikkingsooreenkoms wat die Mededingingskommissie en Pioneer Foods bereik het, het die Mededingingstribunaal verhoed om dié veelvuldige kartel-sage vandag (Woensdag, 24 November) af te handel.

Die Tesourie se regsverteenwoordigers het egter nie uitgebrei oor die besonderhede nie.

Mnr. Norman Manoim, voorsitter van die Tribunaal, het die saak uitgestel tot Dinsdag, 30 November, sodat die kommissie, die Departement van Ekonomiese Ontwikkeling en die Tesourie hul sake agtermekaar kan kry en te getuig.

Mnr. Thembinkosi Bonakele, adjunkkommissaris van die kommissie is wel die geleentheid gebied om die aanvanklike voetwerk namens die kommissie te doen. Lede van die publiek is ook die geleentheid gegun om kommentaar te lewer.

Bonakele het die agtergrond van die betrokke sake geskets. Indien die skikking bekragtig word, sal dit die kommissie se ondersoek na Pioneer se mieliemeel-, koringmeel-, pluimvee- en eierbesighede afhandel. Gegewe die Tesourie se besware het Bonakele nie te veel besonderhede oor die ooreenkoms gegee nie.

24 November 2010