TLU kap Mbeki oor amnestie aan plaasmoordenaars

Die Transvaalse landbou-unie (TLU) sê die ondeursigtigheid van die presidensiële amnestie vir 33 "uitverkore partygenote, waaronder verskeie plaasmoordenaars", laat met reg vrae by boere ontstaan.

Die unie verwys in 'n verklaring na vier beweerde plaasmoordenaars. Hulle is Zama Thutha, Luvoyo Kulman, Monwabisi Khundulu en Lollie Kwakwari.

Khundulu is skuldig bevind aan die moord op mnr. Mattheus en mev. Jeanette Palvie in 1986 op hul plaas naby Cradock. Thuthu is skuldig bevind aan die moord op me. Donne Meyers in 1993, wat doodgeskiet is toe haar pa, Mike, se voertuig gekaap is terwyl hulle melk afgelewer het. Kulman was aangekla van die moord op me. Leonie Pretorius van die plaas Danside naby Ficksburg in 1992.

Die TLU sê ondanks die polisie en die Waarheid-en-Versoeningskommissie (WVK) se bevinding dat die moorde nie politiek geïnspireerd was nie, laat pres. Thabo Mbeki hulle vry en bevind dat dit deel van die "struggle" was.

Mnr. Gert Ehlers, voorsitter van die TLU, sê pres. Mbeki skuld die boere van die land antwoorde op die vrae of aanvalle op boere politiek geïnspireerd is, of plase teikens is van 'n verlengde "struggle", of plaasaanvallers as vryheidsvegters geklassifiseer word en of die president verhewe is bo die regstelsel en die WVK.

Die president se reg om vrywaring toe te staan, word nie bevraagteken nie. "Hy moet egter 'n voorbeeld aan sy administrasie stel. Deursigtigheid is 'n kernbeginsel van die Grondwet en verg sy respek."

Hy sê pres. Mbeki se raadgewers en sy oordeel het hom in die steek gelaat. "As amnestie ter sprake kom, moet dit alle partye insluit met behoorlike norms sodat daar nie bloot meer misdadigers op straat losgelaat word nie."

Mnr. Ehlers sê die president stel hom bloot aan 'n soort "Mugabe-etiket". 'n Herhaling van hul vorige misdade deur enige van die vrygelates, kan tot eise om vergoeding teen die Regering lei.

"Pres. Mbeki moet sy besluit motiveer. Lippediens bring nie vrede en voorspoed nie. Strategiese planne vir die landbou is bloot papier as die boere nie gerusgestel word nie," het hy gesê.