TLU SA kap Eskom oor salarisse

Die omvang van die salarisverhogings wat Eskom aan sy top-echelons toegestaan het, is met weersin ontvang, sê die TLU SA.

In ‘n nuusverklaring sê mnr. Ben Marais, voorsitter van die TLU SA, sê terwyl verbruikers gebuk gaan onder onbekostigbare tariefstygings wat veroorsaak is deur Eskom se onvermoë om tydig maatreëls te tref om die stygende energievraag te akkomodeer, is die einste topbestuur nou die bevoordeeldes wat baat vind by dié toename in inkomste. Dit alles desondanks die feit dat ’n verdere tariefverhoging verbruikers in die oë staar.

“Uit syfers wat in die media gerapporteer is, is daar ’n duidelike verband tussen die toename in inkomste (28,6%) en die afgelope twee jare se tariefverhogings,” sê Marais. “Die vraag kan dus met reg gevra word of Suid-Afrika se energieverbruikers genoeë moet neem met die nuutste toedrag van sake? Waarom word die styging in inkomste nie benut om verbruikers, wat reeds in ’n onbenydenswaardige kosteknyptang vasgevang is, tegemoet te kom nie?”

“Ek kan tot geen ander gevolgtrekking kom as dat daar ’n selfverrykingsproses aan die gang is wat deur kliente gefinansier word terwyl energievoorsiening steeds ’n risiko vir verbruikers inhou nie.”

“Dit is hoog tyd dat Eskom se topbestuur hand in eie boesem en beursie steek”.

Lees ook: Eskom skuld boere verskoning

1 Julie 2011