Ná vele waarskuwings oor swak verslae het die Parlement se portefeuljekomitee vir landbou, bosbou en visserye die departement en sy provinsiale hoofde weggejaag.
Dit het gebeur nadat lede van die provinsiale landboukomitees en die een van die Parlement ontdek het dat noodsaaklike inligting uit verslae van die departement kortkom.
Die amptenare is aangesê om eers weer na die komitee terug te kom wanneer volledige verslae beskikbaar is wat duidelik die departement se uitdagings, mislukkings en sy welsale reflekteer.
Die amptenare moes aan die komitees verslag lewer oor die Regering se omvattende landbousteunprogram (Casp) en sy leningskema vir swart boere (Mafisa), Illima-Letsema, Landcare en die ander nuwe projekte wat hy mee begin het.
Slordige en onvolledige verslae
Me. Tina Joemat-Pettersson, Minister van Landbou, Bosbou en Visserye, het al self haar departement voor stok gekry vir slordige en onvolledige verslae.
Volgens die komitee maak die verslae nie sin nie omdat dit nie reflekteer wat komiteelede gesien het toe hulle projekte besoek het nie. Die verslae het ook net syfers bevat en nie inligting oor wat bereik is en wat die struikelblokke is nie.
Mnr. Lulu Johnson, voorsitter van die Parlement se portefeuljekomitee vir landbou, bosbou en visserye, het gesê dat die amptenare van die departement moet seker maak dat hulle die doelwitte van die programme verstaan en dat hulle mandaat een is om armoede te verlig.
Komiteelede het ook hul ongelukkigheid meegedeel oor die voortdurende afwesigheid van beide Joemat-Petersson en haar adjunkdirekteur-generaal, mnr. Langa Zita, wanneer die departement aan die komitee moet verslag lewer. ‘n Vergadering met die provinsiale departementshoofde en die Minister sal voor einde Junie belê word.
15 Mei 2102
