Touwsrivier is in vloed

Die Touwsrivier is vir die eerste keer sedert 2003 in vloed, met 130mm reën wat die afgelope week plek-plek in die Karoo geval het.

Me. Lizelle Denton van die distrik Ladismith sê tydens die vorige vloed het die Belair-dam se wal gebreek.

Volgens Denton het hulle sedert Dinsdag (7 Junie) 135 mm op hul plaas sowat 30 km suid van die dorp gemeet. Sy sê dit het Donderdagmiddag (9 Junie) opgehou reën ná ’n laaste swaar bui reën.

Kyk hier na foto’s wat Denton vir Landbou.com gestuur het.

400 mm in drie dae
Intussen sê mnr. Andries Theron, die ondervoorsitter van Graan SA, sommige boere in die distrik Riversdal het sedert Dinsdag (7 Junie) 400 mm reën gehad.

Hy sê in die Swartland het hulle nie die week baie reën gehad nie en die gewasse op die lande – wat tans hoofsaaklik koring en kanola is – lyk “baie mooi”.

Theron sê hoewel vanjaar se aanplantings sowat drie weke later al die normale tyd is, verwag hulle nie probleme nie, want die aanplantings in die winterstreke lyk oor die algemeen goed.

Die Oranjerivier
Mnr. Johannes Möller, die voorsitter van Agri SA, sê die Oranjerivier loop tans sterk teen sowat 2 500 kubieke meter per sekonde. Hy sê hulle hoop dat die rivier nie weer sal oorstroom nie.

Mnr. Johan van den Berg, ’n weerkundige van Santam Landbou, sê tussen 100 mm en 200 mm het oor groot dele van die Vrystaat, Noord-Kaap, Oos-Kaap en selfs Noordwes geval, “en dit op die nat velde, damme en riviere wat steeds in vloed was van die reën in die somer.”

“Die water wat nou op pad is Upington toe, is waarskynlik heelwat meer as die vloed vroeër vanjaar. Die kleiner damme in die Vrystaat loop byvoorbeeld nou teen sterker oor as wat die Bloemhofdam vroeër vanjaar geloop het toe sy walle oorstroom het.

"Die water gaan die volgende paar dae die Benede-Oranjerivier tref.  Ek het vanoggend (Vrydag, 10 Junie) met iemand op Douglas gepraat en hulle ontruim huise daar,” aldus Van den Berg.   

Lees hier Van den Berg se nuuste weervoorspelling op Landbou.com

10 Junie 2011