Tozi ontken ‘bedanking’

“Ek het nooit aan enigeen enige bedankingsbrief gegee nie,” het mnr. Tozi Gwanya, Direkteur-Generaal van die Departement vir Landelike Ontwikkeling en Grondhervorming, aan Landbouweekblad gesê.

Dit kom ná talle gerugte dat hy bedank het nadat ‘n verslag van die Ouditeur-Generaal, wat verskeie kwessies in die departement ondersoek het, die lig gesien het.

Volgens die DA het die OG die verslag op sy (die DA) se versoek gedoen. Gwanya het gesê die DA het “sommer in die media namens hom bedank”.

Verskeie bronne
Me. Annette Steyn, DA-LP, het vroeër aangedui dat sy bevestiging van verskeie bronne ingewin het dat hy wel bedank het.

Landbouweekblad het self ook vroeër vertroulik van ‘n hooggeplaaste in die Departement vir Landelike Ontwikkeling en Grondhervorming die bedanking bevestig.

Vanmidddag (19 Julie) het mnr. Eddie Mohoebi, woordvoerder van die departement, aangedui dat Gwanya steeds die DG is.

Die departement het ‘n agterstand van R3,4 miljard in uitbetaling vir toelaes nadat oordrag van grond, regseise van meer as R497 miljoen en R580 miljoen se agterstand in die uitbetaling aan boere by wie hy grond gekoop het.

19 Julie 2010