Trekkerverkope blom in Desember

Trekkerverkope van 381 eenhede in Desember was aansienlik hoër (72%) as die 221 eenhede wat verlede Desember verkoop is.

Mnr. Lane Reynolds, voorsitter van die SA Landboumasjinerie-assosiasie, sê algehele trekkerverkope vir 2010 was ongeveer 7% laer as verkope in 2009. Stroperverkope van 14 eenhede in Desember was beduidend hoër as die 5 eenhede wat die vorige Desember verkoop is. Algehele stroperverkope vir 2010 was byna 32% laer as verkope vir die vorige jaar.

Trekkerverkope in Desember was baie goed en volg op die laat aanvang van algemene somerreën. Dit is ’n kopersmark met betrekking tot stabiele pryse weens die sterk rand én finansiering wat makliker geword het in die afgelope twaalf maande. Dit het daartoe gelei dat baie boere besluit het om die geleentheid, om te belê in kapitaaltoerusting, te benut.

Vroeër in die jaar was ramings dat algehele trekkerverkope vir 2010 sowat 5 000 eenhede, 10% laer as vir die vorige jaar, sou wees. Die beter as verwagte verkope in Desember het egter gelei tot algehele trekkerverkope van 5 155 eenhede in 2010 en dit is net 7.1% laer as verkope in 2009.

10 Desember 2011