Twee landbouleiers oorlede

Twee landbouleiers uit die Vrystaat is onlangs oorlede. Mnr. Theuns Swart van die plaas Country Clear by Vrede en voormalige voorsitter van Vrystaat Landbou (VL), het ná ’n lang stryd teen kanker op 30 Augustus gesterf.

Swart was onder meer voorsitter van die Vrystaatse en nasionale graansorghumkomitees, die Sorghumprodusente-organisasie en die Graansorghumraad. Hy het ook VL in Agri SA se algemene raad verteenwoordig.

Hy laat sy vrou, dogter en kleinseun agter. Die gedenkdiens vind op 3 September om 11:00 vanuit Vrede se NG-moedergemeente (Klipkerk) plaas.

Mnr. Kosie Pretorius het op 31 Augustus ná ’n kort siekte beswyk. Hy het die Suid-Vrystaat in Vrystaat Landbou se veiligheidskomitee verteenwoordig. Hy het veral baanbrekerswerk gedoen ten opsigte van samewerking tussen veiligheidsmagte en die instelling van plaaspatrollies.

Pretorius laat sy vrou, kinders en kleinkinders agter. ’n Gedenkdiens word vandag (2 September) om 11:00 in die APK-moedergemeente, Rooiwalsingel, gehou.

2 September 2009