Uitspraak in Senwes-saak verwag

Die eerste skote in die hofgeding tussen die landboureus, Senwes, en een van sy minderheidsaandeelhouers, die private ekwiteitsgroep, Treacle, het gister (19 Augustus 2010) in die Noord-Gautengse Hooggeregshof geklap.

Regter Moses Mavundla sal vanoggend (Vrydag) ’n beslissing fel in ’n dringende aansoek van Treacle om die beleggingsmaatskappy Senwesbel te verhoed om sy stemreg ten opsigte van 8,3 miljoen aandele by ‘n jaarvergadering van Senwes op 26 Augustus uit te oefen. Treacle voer aan dat die Maatskappywet oortree is toe Senwesbel dié aandele bekom het.

Senwesbel, wat gestig is om boere se beheer oor die landboumaatskappy te verseker, se aandeel in Senwes is 39%. Indien die dringende aansoek toegestaan word, sal hy net stemreg oor 34% by die jaarvergadering kan uitoefen. Mnr. Nick Maritz SC, wat namens Treacle verskyn het, het aangevoer dat dit van beduidende belang is.

Treacle en Royal Bafokeng
Hy het daarop gewys dat Treacle en die Royal Bafokengstam, as ’n bemagtigingsgroep, saam ’n 34% aandeel het en in baie opsigte met mekaar saamstem.

Treacle voer aan dat Senwesbel vyf jaar gelede op onwettige wyse 8,3 miljoen Senwes-aandele van 3 500 minderheidsaandeelhouers gekoop het. Die Maatskappywet is glo oortree omdat Senwes die transaksie finansier het.

Mnr. Chris Eloff SC, namens Senwesbel, het onder meer aangevoer dat die koop van die aandele en die lening by Senwes afsondelike transaksies was en dat daar nie dringendheid is nie omdat die applikant reeds maande lank van die datum van die jaarvergadering bewus was.

Die hofgeding oor die aandele sal in November voorkom.

Lees die agtergrond oor die hofgeding en die volledige hofstukke hier: Senwes en Treacle - die argumente

20 Augustus 2010