Veediefstal neem af, tog is daar kommer

Hoewel kommer bestaan dat die owerheid nie veediefstal in dieselfde ernstige lig as sommige ander misdade beskou nie, was daar die afgelope twee jaar 'n bemoedigende afname in dié misdaad.

Só het mnr. Eppie Nel, verteenwordiger van die RPO in die nasionale veediefstalkomitee, gesê. Hy het gesê die aantal gesteelde beeste het van 2000 tot 2001 met 13 % gedaal. Die persentasie beeste wat teruggekry is, het in dieselfde tydperk met 4 % afgeneem. Die aantal kleinvee wat gesteel is, het van 2000 tot 2001 met 26 % gedaal en dieselfde persentasie is teruggevind.
Die waarde van die 110 319 stuks kleinvee en 67 541 beeste wat as gesteel aangemeld het, was sowat R300 miljoen.
"Hoewel die dalende neiging bemoedigend is, moet die vraag gestel word of daar nie dalk boere is wat weens verskeie frustrasies nie alle veediefstalle aanmeld nie."
Mnr. Nel het 'n beroep op boere gedoen om te verseker dat hul vee gemerk is, veeregisters bygehou word, korrekte vervoerdokumente by te hou en alle veediefstalle aan te meld. Die afskaling van die polisie se spesialiseenhede kwel ook en hy het gevra dat sommige van die eenhede behou word om werk ten opsigte van dié misdaad te doen.
2 Augustus 2002