Veeverliese weens natuurrampe

Die rooivleisbedryf het verlede jaar ongeveer R250 miljoen se skade gely toe onverwagte swaar sneeu in KwaZulu-Natal, Mpumalanga en die Vrystaat voorgekom het. Na verwagting sal groot verliese ook voorkom in die omgewing van Elliot, Ida, Ugie en Cala wat onlangs deur die swaarste sneeuneerslae in meer as 60 jaar getref is.

Die RPO het bekend gemaak dat hy saam met ander betrokkenes met die Regering 'n hulpskema beding sodat boere vergoed kan word vir skade weens natuurrampe soos dié.
Die organisasie het die inisiatief geneem om die grootste handelsbanke en die Land Bank te vra om nie instrumenteel te wees in die likwidering van boere wat weens sulke rampe nie die mas kan opkom nie.
Afgevaardigdes het daarop gewys dat dit 'n leemte is dat die owerheid ten spyte van hulp om die infrastruktuur ná rampe weer te herstel, tot dusver nie 'n skema gereed het om boere vir veeverliese weens onbeheerde veldbrande en gure weer by te staan nie.
2 Augustus 2002