Verbod op Namibiese vleis deels gelig

Sekere beperkings op die invoer van lewende hawe en vleis uit Namibië na Suid-Afrika is gelig, onderhewig aan sekere maatreëls.

In ‘n nuusverklaring sê Suid-Afrika se Departement van Landbou, Bosbou en Visserye die verbod op die invoer van wilds-, bees- en bokvleis asook afval uit Namibië vir persoonlike verbruik is gelig, mits dié vleis nie van diere uit die geraakte Slenkdalkoorsgebiede is nie.

Kliënte aan wie permitte vir die invoer van 200 kg biltong toegestaan is, en wat graag wildsvleis na Suid-Afrika wil bring, moet geskrewe toestemming van die department se permitkantoor kry. Die perk vir die toegelate hoeveelheid biltong verlaag dan tot 100 kg.

In ‘n spesiale nuusbrief het die Namibiese Landbou-unie meer inligting oor die gedeeltelike opheffing van die verbod aangebied:

Lewende hawe (bees, skaap, bok en wild) na Suid-Afrika moet vergesel wees van ‘n SA veterinêre invoerpermit asook ‘n gesondheidseritifkaat wat deur Namibiese direktoraat van veeartseny uitgereik is, onderhewig daaraan dat:
* Diere nie deur ‘n Slenkdalkoors besmette omgewing beweeg nie (dit is slegs die plase wat tans onder kwarantyn is as gevolg van Slenkdalkoors).
* Diere afkomstig is van plase wat nie binne ‘n radius van 5 km van ‘n plaas is wat besmet is nie.
* Beeste, skape en bokke wat deur Botswana beweeg, moet steeds ingeënt wees en ‘n onttrekkingsperiode van 21 dae deurgemaak het.
* Diere wat nie geënt is nie, kan dus slegs deur die Ariamsvlei en Noordoewer-grensposte na Suid-Afrika beweeg.

Oor vleis en biltong sê die NLU:
* Vleis afkomstig van die bek-en-klouseer vrye sone kan uitgevoer word sonder die vereiste verkoeling soos voorheen van toepassing.
* Wildsvleis vir eie gebruik kan uitgevoer word onderhewig aan ‘n gesondheidsertifikaat van die Namibiese direktoraat van veeartseny, wat aandui dat die diere nie afkomstig is uit ‘n gebied onderhewig aan Slenkdalkoors nie.
* Biltong en droëwors tot 200 kg is onderhewig aan ‘n SA Veeartseny-invoerpermit asook ‘n gesondheidsertifikaat van die Namibiese direktoraat van veeartseny. Die SA invoerpermit is verkrygbaar by die SA Veeartseny-permitkantoor in Pretoria by tel.: 0027 12 3197420, of faks 0027 12 3296892, of per e-pos: Julie-AnnC@daff.gov.za

Beweging van diere in Namibië
Die beweging van alle diere is toelaatbaar met die normale bewegingspermit uitgereik deur Namibiese direktoraat van veeartseny, uitgesluit diere vanaf die plase onder beperking van Slenkdalkoors.
Die beweging van diere vanaf besmette plase is onderhewig aan inentings met ‘n onttrekkingsperiode van 21 dae.

Sien ook nuusverklaring hieronder, in PDF-formaat.

7 Junie 2010