‘Verbruikers word mislei’

Foto: THEUNS BOTHA

Suid-Afrikaanse verbruikers word mislei wat kos- en kragpryse betref, sê mnr. Mike Schüssler van Economosts.co.za. Hy het die Nasionale Verbruikersforum verlede week in Midrand toegespreek.

Schüssler sê kospryse styg met sowat 10% op verbruikersvlak. Hy is krities oor elektrisiteitpryse en sê nuwerhede betaal lae pryse terwyl middelklas-verbruikers se kragkoste van 1996 tot vanjaar verdriedubbel het. Munisipaliteite maak winste van net minder as 100% op water en elektrisiteit.

Hy meen Eskom diskrimineer teen middelklas-verbruikers. Eskom verkoop krag teen goedkoper as basiese koste aan internasionale kliënte, maar Suid-Afrikaners betaal jaarliks meer en meer. “Dit is nie korrek om te sê ons het die goedkoopste elektrisiteit in die wêreld nie. Sê eerder vir ons, ons bedryf het die laagste pryse in die wêreld. Hoe kan ons elekrtisiteit teen ’n derde van die prys uitvoer wat ons eie verbruikers betaal en dan vir nóg 34% vra?”

Schüssler meen dat leuens aan verbruikers vertel word. Die skuld vir hoë kragpryse is op duur koolpryse geplaas, maar dié pryse het met tussen 60 % en 70 % gedaal. “Daar word leuens vertel. Die feit is dat Eskom met sy pryse diskrimineer.” Talle mense in Suid-Afrika betaal nie vir elektrisiteit nie, maar die middelklas word gedwing om ekstra te betaal en om bedryfsgebruik te dek.

“Munisipaliteite sê hulle sien om na die verbruiker, maar dis goedkoop praatjies. Die Regering behoort ook te weet wat verbruikersregte is.”

Bron:
Fin24.com, Fin24 artikel 2

22 Junie 2009