Verregse groep skep 'n probleem

"Die gebruik van die begrip 'boere' deur diegene wat hulself aan polities geïnspireerde geweld verbind, skep vir die breë verteenwoordigende groep boere in Suid-Afrika 'n probleem. Dit kan die indruk laat dat dit 'n beweging van boere is, terwyl dit klaarblyklik mense uit verskillende beroepe insluit."

Dit is ook skadelik vir die verhoudings waarbinne landelike bestendigheid en vooruitgang nagestreef word, sê mnr. Kiewiet Ferreira, voorsitter van Agri SA se wet- en ordekomitee. Hy wys daarop dat Agri SA met sy affiliasies, wat provinsiale unies, bedryfsorganisasies en landbou-ondernemings insluit, die uitsluitende taak het om landboubelange vreedsaam te bevorder.

"Agri SA en sy affiliasies het ondersteuners uit alle groeperings van die samelewing en van verskillende politieke oortuigings wat saamwerk om binne die raamwerk van die Grondwet en sy instellings geleenthede vir groei en ontwikkeling te skep."

Mnr. Ferreira het bygevoeg dat daar nie plek vir partypolitiek in Agri SA is nie. Hy het 'n beroep op alle betrokkenes, insluitend die media, gedoen om die georganiseerde landbou by te staan om hierdie verkeerde indruk van boere reg te stel.

13 Desember 2002