Verslag oor plaasmoorde byna gereed

Die lank verwagte verslag oor die oorsake van plaasmoorde sal na verwagting einde vandeesmaand aan mnr. Charles Nqakula, Minister van Veiligheid en Sekuriteit, oorhandig word.

Mnr. Martin Schönteich, 'n senior navorser by die Instituut vir Veiligheidstudies en woordvoerder van die komitee, sê die verslag word nou afgerond en die komitee hoop om dit einde Januarie gereed te hê. Dit is in hierdie stadium net in Engels en die ondersoekkomitee moet nog besluit of dit eers vertaal sal word voor dit oorhandig word en of 'n vertaling later sal volg.

Die ondersoek is bykans twee jaar gelede in opdrag van wyle mnr. Steve Tshwete, mnr. Nqakula se voorganger, begin ná 'n onderneming van die Regering om dringend onafhanklike navorsing te laat doen na die motiewe en faktore wat tot plaasaanvalle lei.

Die ondersoek moes al maande gelede afgehandel gewees het, maar die taak was groter as wat enigeen verwag het, sê die voorsitter, adv. Charl du Plessis, afgetrede prokureur-generaal van die Noord-Kaap. Namate die ondersoek gevorder het, was daar ook voortdurend nuwe voorvalle en omstandighede om in ag te neem.

Die ondersoek is in November op 'n vergadering van die werkgroep met die kommersiële landbou en verskeie ministers, onder voorsitterskap van pres. Thabo Mbeki, uitgesonder as 'n sleutelkwessie waarmee vordering gemaak is. Mnr. Nqakula het toe onderneem om voor die einde van die jaar die verslag bekend te maak.

Hy het gesê die ondersoek was omvattend en ingewikkeld, maar dit sal hopelik nuttige insigte lewer om misdaad op plase te bekamp.

17 Januarie 2003