Vertragings met invoertariewe onaanvaarbaar

Graan SA het die departement van finansies oor die vingers getik oor onnodige en onverklaarbare vertragings met die aanpassing van invoertariewe op koring en mielies.

Ná 'n gesloer van meer as vyf maande, is 'n invoertarief van R32,80 op koring eers onlangs in die Staatskoerant afgekondig. Die formule vir koring het reeds op 21 Januarie getoon 'n tarief van R32,77 moet op ingevoerde koring gehef word. Op 15 April het die tarief weer verander en dit behoort nou al R105,50 te wees.

Graan SA se verwagting was dat die departement eerder die jongste tarief sou aankondig. As internasionale prysvlakke gehandhaaf word, behoort die tarief volgens die formule binnekort vir 'n derde keer verhoog te word.

Volgens die formule vir mielies moes 'n tarief van R16,52 reeds sedert 15 April in werking gewees het.

Mnr. Bully Botma, voorsitter van Graan SA, sê graanboere kan nie aanvaar dat die owerheid maande nodig het om die veranderings in invoertariewe administratief af te handel nie.

"Suid-Afrikaanse boere kry feitlik geen bystand van die staat nie en tariewe is die enigste instrument om hulle in 'n mate teen gesubsidieerde invoere te beskerm. Die tydige afkondiging van tariewe is nie slegs noodsaaklik vir die geldelike oorlewing van boere nie, maar speel ook 'n belangrike rol in die welvaart van 'n gebied waar die koring- en mieliebedryf die ruggraat van die ekonomie is."

Mnr. Botma sê tariewe word gegrond op 'n ooreengekome formule wat al jare gelede deur die staat goedgekeur is. Op- en afwaartse veranderings vind outomaties volgens dié formule plaas en moet net deur die Departement van Finansies in die Staatskoerant gepubliseer word ná dit deur die Internasionale Kommissie vir Handelsadministrasie bekend gemaak is.

Hy sê gereelde versoeke van Graan SA, asook ander betrokkenes in die bedryf, om 'n administratiewe prosedure vir 'n vinniger verandering van tariewe daar gestel te kry, val steeds op dowe ore.

18 Julie 2003