Vertroue in landbou neem toe

Die LBK/IDC-Landbousake se vertroue-indeks is reeds ’n jaar lank positief met die hoogtepunte wat in 2011 bereik is, sê die Landboubesigheidskamer (LBK). Luidens ’n verklaring het die indeks in die tweede kwartaal van 2011 op 62,7% te staan gekom.

Dit is sowat 1% hoër is as in die eerste kwartaal van 2011, maar 12% hoër teenoor die indeks van die tweede kwartaal in 2010. Vir dié tydperk het die indeks op 55,7% te staan gekom, wat die eerste positiewe persentasie sedert die derde kwartaal van 2008 was.

Veranderinge
Die indeks het in 2009 sy laagste punt nog, onder 35%, bereik. Dit is toegeskryf aan die invloed van die wêreldwye ekonomiese insinking op die plaaslike ekonomie.

Luidens die verslag het landbou-ondernemings verlede jaar in die ooreenstemmende tyd onder lae kommoditeitspryse en die invloed van droogtes op boere se inkomste deurgeloop. Die jongste indeks dui aan dat kommoditeitspryse herstel het. Die weerstoestande het ook verbeter met beter oeste en vee van ’n beter gehalte wat gelewer word.

Druk
Talle ondernemings dui egter aan dat hulle, veral weens hoë kragtariewe en stygende brandstofpryse, steeds druk ervaar. Dié ondernemings konsentreer gevolglik op kostebesnoeiing. Al hoe meer van dié ondernemings verwag dat hulle eerder poste gaan verminder as om nuwe werksgeleenthede te skep.

Die meeste landbou-ondernemings ervaar ook afnames in uitvoervolumes, met die volstruis- en wildsvleisuitvoerbedryf wat onder geweldige druk is weens die uitbreking van die H5N2-virus en bek-en-klouseer. Alle uitvoerbedrywe, insluitend die wyn- en vrugtebedrywe, ervaar tans druk weens plaaslike probleme en die swak buitelandse verdienstes vanweë die sterk rand.

Die LBK sê hoewel die indeks oor die afgelope jaar geleidelik gestyg het, verwag hy dat die indeks oor die volgende maande gaan afplat en sywaarts beweeg.

27 Mei 2011