Vervoer: Staking kan landbou ontwrig

Die landwye vervoerstaking kan die landbousektor - asook die voorsiening van voedsel aan winkels - ontwrig, sê dr. John Purchase, hoof van die Landboubesigheidskamer (LBK).

“Landbou-logistiek speel ‘n baie belangrike rol in die vervoer van byvoorbeeld grane na verwerkers. Dié staking gaan nie net die vervoer van landbouprodukte na verwerkers ontwrig nie, maar dit kan ook groot implikasies vir die voorsiening van varsprodukte soos vrugte, melk en groente aan winkels beteken,” sê hy.

Dié staking is aangekondig nadat werkers in die bedryf ‘n loongeskil met werknemers verklaar het.

Purchase skat dat die geraakte partye gebeurlikheidsplanne in plek sal hê, maar hy sê dié staking kan ‘n impak op die voorsiening van voedsel hê, “en almal is bekommerd daaroor. Dis jammer dat hulle dít wil doen in ‘n tyd wat die land ‘n goeie beeld aan die buitewêreld en oorsese besoekers moet stuur. Dié tydsberekening laat veel te wense oor!”

Purchase meen dat stakings in die land onder die loep geneem moet word. “Daar is baie stakings. Kyk nou maar na die munisipale stakings. Daar het al soveel van hulle plaasgevind en elke keer het dit ‘n uitwerking op dienslewering. Êrens moet ‘n streep getrek word!”

Intussen berig Sake24.com die staking by Transnet dreig om die land se brandstofverskaffing te ontwrig. Ludiens die berig kan die staking ook spoorvervoer van sleutel-kommoditeite, soos ystererts en die verskaffing van steenkool aan kragstasies en voertuie, ontwrig.

Bron: Sake24.com

10 Mei 2010