Verwyder eers indringerplante

Regte is gekoppel aan verantwoordelikhede. Daarom behoort grondeienaars verplig te word om indringerplante op hul grond uit te roei voordat hulle toegelaat word om grond te verkoop, het dr. Guy Preston, 'n direkteur van Suid-Afrika se Werk-vir-Water-program, op 'n internasionale kongres vir onkruidwetenskaplikes in Durban gesê.

Die gedagte dat grondeienaars verplig moet word om indringerplante op hul grond uit te roei, word reeds jare lank versprei. In sommige gevalle is die koste vir die uitroei van indringers hoër as die grondwaarde.

Preston het die Regering oor die Werk-vir-Water-program geadviseer. Altesame 17 500 mense is by dié program betrokke en meer as R400 miljoen word jaarliks daaraan bestee.

Prof. Charlie Reinhardt, voorsitter van die Suider-Afrikaanse Vereniging vir Onkruidwetenskap (SAVO), wat die kongres aangebied het, het gesê as ál die indringerplante in die land saamgevoeg word, sal dit 10 miljoen hektaar bedek. Dit is gelykstaande aan die grondoppervlak wat vir produksie benut word.

"Wat onkruid betref, staar die land groot uitdagings in die gesig. Suid-Afrika se eiesoortige biodiversiteit word hierdeur bedreig."

Dr. Chris Mulder, kongresorganiseerder, het gesê dié byeenkoms van die Internasionale Onkruidwetenskapsvereniging (IWSS) is 'n eerste vir Suid-Afrika en Afrika. "Die ontwikkelende wêreld is die bewaarders van die grootste deel van die wêreld se biodiversiteit, maar die vermoë om die natuurlike hulpbronne volhoubaar te benut en mense te voed, skiet dikwels tekort."

Sowat 500 afgevaardigdes vanoor die hele wêreld het die kongres bygewoon.