Vier boere dien op LNR

Vir die eerste keer is vier kommersiële boere as lede van die Landbounavorsingsraad aangewys. Verlede jaar was daar net een, mnr. Japie Celliers van Ermelo, in die raad. Daar is ook nou tien raadslede, pleks van die vorige agt.

Die boere wat aangestel is, is me. Ansora Geldenhuys van Klerksorp, 'n bekende teler van Gelbvieh-beeste; me. Jean Davidson, 'n roosboer van Krugersdorp; mnr. Piet Karsten, 'n bekende wingerd- en vrugteboer van Kanoneiland, naby Upington; en mnr. A.R. Tshivhase, 'n mangoboer van Mpumalanga en 'n vorige ondervoorsitter van die National African Farmers' Union.

Drie van die vorige raadslede se dienstermyn het al einde Februarie vanjaar verstryk, maar net twee van die vorige raadslede is heraangestel. Hulle is die voorsitter, mnr. T. Setiloane, uitvoerende direkteur van Real Africa, en prof. Frans Swanepoel van die Universiteit van Pretoria, wat ondervoorsitter van die vorige raad was.

Landbouweekblad is in besit van die amptelike brief waarin die kantoor van die direkteur-generaal van die Departement van Landbou die aanstelling van die tien raadslede aan die hoof uitvoerende beampte van die LNR bekend maak, maar niemand was bereid om met Landbouweekblad daaroor te praat nie.

Ná talle telefoonoproepe is Landbouweekblad na me. Nana Zemani, woordvoerder van me. Thoko Didiza, Minister van Landbou en Grondsake, verwys, maar sy het verklaar dat sy nie die nuwe raadslede se name bekend kan maak voor sy nie 'n opdrag van die minister ontvang het nie.

Die ander nuwe raadslede is mnr. A.M. Hawes van Mpumalanga se departement van landbou; dr. M. Mbewe van die Universiteit van die Noorde; mnr. M. Singo, besturende direkteur van Singoflora, 'n produsent en handelaar in snyblomme; en prof. J.G. Raats van die Universiteit van Fort Hare.