Vleisbedryf nou eens oor heffings

Statutêre heffings vir die rooivleisbedryf is nou 'n werklikheid. Al die betrokkenes in die lang produksie- en verwerkingsketting van die bedryf het eenparig op 'n vergadering van die Rooivleisbedryfsforum van Suid-Afrika in Pretoria besluit om by die Minister van Landbou aansoek te doen om die instelling van 'n proporsionele statutêre heffing vir die bedryf.

Finale besonderhede oor die voorgestelde vleisheffing sal eers bekend wees nadat die aansoek by die bemarkingsraad ingedien is. Deel hiervan is die omvang van die heffings, hoewel betrokkenes dit as 'n voorvereiste stel dat dit vir almal bekostigbaar moet wees.

Die omvang van die heffings wat by elke punt ingevorder gaan word, sal eers bepaal kan word wanneer die begrotings vir elke funksie in belang van die hele bedryf op die tafel is. 'n Heffing van 8 % soos tans redelik algemeen genoem word, is 'n skoot in die donker, sê woordvoerders van verskeie organisasies in die bedyf met wie Landbouweekblad gesels het.

Aanduidings is dat die heffings oor 'n breë front ingesamel sal word. Uiteraard sal dit by die slagplase begin. 'n Gedeelte sal deur ingevoerde vleis en huide gedra word, terwyl aan dit aan die uitvoerkant net op huide en velle gehef gaan word. Laasgenoemde is belangrik omdat dit die enigste manier is om bosslagterye vir 'n bydrae te betrek. Ook die handel gaan betrek word.

Die insameling van die heffings sal waarskynlik deur 'n onafhanklike struktuur gehanteer word. Die gedagte is dat die voordele van 'n trust of 'n artikel 21-maatskappy vir dié doel dalk die aangewese weg is.

Die wetlike bepalings oor die aanwending van statutêre heffings is baie duidelik dat die geld nie vir organisatoriese doeleindes aangewend mag word nie. Dit beteken dat die Rooivleisprodusente-organisasie (RPO) byvoorbeeld vir dié doel met hul vrywillige heffings sal moet voortgaan. Dienste in belang van die hele bedryf, soos 'n behoorlike inligtingsdiens, sal uit heffings gefinansier kan word. Mnr. Gerhard Schutte, hoofbestuurder van die RPO, sê die organisasie is opgewonde om deel van die proses te wees.

Voortaan gaan geld in elk geval jaarliks net op grond van 'n behoorlike sakeplan toegedeel word, terwyl bewys van prestasies aan die einde van elke jaar 'n vereiste sal wees. Heffings word vir tydperke van vier jaar op 'n keer ingestel met jaarlikse aanpassings gegrond op die behoeftes van die bedryf.

Aanduidings is dat die finale aansoek nie later nie as einde Oktober by die bemarkingsraad ingedien gaan word.