Vordering met droogte-bestande gewasse

Wetenskaplikes begin goeie vordering maak met navorsing oor geneties gemodifiseerde (GM) gewasse wat weerstand teen strestoestande, soos droogte, koue en brak grond, sal hê.

Dr. Willy de Greef, 'n internasionale kenner van biotegnologie, het op die pas afgelope wêreldkongres vir landboujoernaliste buite Bela-Bela gesê gesamentlik kan hierdie strestoestande verantwoordelik wees vir die groot gaping tussen 'n moontlike opbrengs en werklike produksie.

Veral in 'n marginale gebied of een met onsekere klimaatstoestande kan dié gewasse 'n belangrike rol speel. Hy sê in Suider-Afrika en die noord-ooste van Afrika (wat blootgestel is aan jare van ernstige droogtes) kan droogtebestande gewasse die verskil tussen 'n katastrofe en 'n kleiner plaaslike oes.

De Greef sê die toepassing van die tegnologie sal waarskynlik nie in die hande van boere wees voor in die volgende dekade nie.