VPI: Produsentepryse nou sigbaar

“Verlede jaar se dalings in pryse aan produsente is na verwagting eers nou aan verbruikers deurgegee, want die daling in die verbruikersprysindeks (VPI) na 5,1% in Maart kan hoofsaaklik aan laer voedselpryse toegeskryf word,” sê me. Lulu Krugel, ‘n ekonoom vir KPMG.

Statistieke SA het gister aangekondig dat die VPI vir Maart vanjaar, op ‘n jaar-tot-jaar basis, op 5,1% te staan gekom het. Dit is 0,6% laer as die VPI van 5,7% vir Februarie vanjaar.

Krugel sê die stadige deurgee van pryse aan verbruikers is verrassend. “Ons het nie kon dink dat die verlaging eers nou by verbruikers sou uitkom nie. Ek dink wel daar was druk op groot- en kleinhandelaars om die verlagings van verlede jaar uiteindelik na verbruikers deur te gee”, vertel sy.

Krugel voorspel dat die inflasiekoers volgende maand na 4,9% kan daal, en sy verwag dat dit vir die res van die jaar tussen 5% en 6% gaan bly.

Dieselprys aan die styg
Krugel sê hoewel dié daling goeie nuus vir die verbruiker is, voorsien sy dat stygings in insetkoste ongunstige gevolge vir boere kan inhou. “Veral as mens die verhoogde kragpryse asook die styging in oliepryse in ag neem, kan dit lei tot ‘n moontlike styging in die produksieprysindeks (PPI).”

Sy voorspel dat die Departement van Energie ‘n aansienlike styging in die dieselprys vir volgende maand gaan aankondig. “Die oorverhaling vir diesel staan vandag op 28 sent. Die eintlike prys is 34 sent, maar die sterker rand veroorsaak ‘n daling van 6 sent. Wat die petrol aanbetref sal die styging tussen 12 sent en 13 sent wees”.

Geen verdere rentekoersverlagings
“Ons dink nie dat rentekoerse vir die res van die jaar weer verlaag sal word nie,” sê Krugel. Sy meen die Reserwebank gaan verskeie faktore vir eers dophou voordat ‘n besluit oor nog ‘n rentekoersdaling gemaak sal word.

“Die monetêre beleidskomitee gaan nou eers die uitwerking van die Sokker Wêreldbekertoernooi, stygende oliepryse, die swakker ekonomieë van Griekeland en Spanje, asook hoër elektrisiteitspryse op die land dophou. Ek dink rentekoerse gaan vir die res van die jaar dieselfde bly, met ‘n moontlike 50 basispunt styging aan die einde van die jaar,” sê Krugel.

30 April 2010