Vrae oor Lancewood se stappe

Vrae bestaan oor stappe wat Lancewood, ‘n suiwelmaatskappy in George, geneem het om sy melkinname met 70 000 liter per dag te sny, terwyl hy vroeër vanjaar na bewering ‘n bykomende 80 000 liter per dag ingeneem het.

Mnr. Dèan Kleynhans, voorsitter van die Melkprodusente-organisasie, sê die maatskappy se besluit om sy inname te snoei is teleurstellend en verrassend, veral nadat Lancewood vroeër vanjaar ‘n kontrak vir nóg melk aangegaan het terwyl hy voldoende voorraad gehad het.

“Lancewood het met ander produsente onderhandel en kontrakte geteken terwyl hy ‘n voldoende melkvoorraad gehad het. Dít is hoekom dit so ‘n verrassing is.”

Volgens Kleynhans is sekere melkprodusente se kontrakte vroeër by ander suiwelmaatskappye gekanselleer, waarna dié melkboere ander melkkopers moes soek en onderhandelinge só met Lancewood begin is.

Oorspoel van melk
Hy waarsku melkboere dat ‘n oorspoeleffek vir ‘n tyd lank in die melkbedryf gaan voorkom. “Die eerste groep produsente is kennis gegee, en hulle het nuwe melkkopers gesoek. Nóg melkprodusente is nou kennis gegee, en hulle moet óók nuwe melkkopers soek, so daar gaan vir ‘n tyd lank ‘n oorspoeleffek wees.”

Kleynhans raai boere aan om versigtig te wees met hulle beplanning, aangesien daar nou ‘n oorskot melk in die land beskikbaar is.

Mnr. Leon Conradie, ‘n onafhanklike raadgewer van Lancewood, het aan Landbou.com gesê weens die oorproduksie in die mark en Lancewood se posisie, moes dié maatskappy kaasproduksie terugsny. “Ons het besluit om die produksie van melk met laer vastestof-inhoud met 70 000 tot 80 000 liter per dag terug te sny. ‘n Glyskaal is gebruik om vas te stel watter melkstalle se produksie besnoei moet word.”

Lees ook: Tydbom gaan bars in melkbedryf

9 Julie 2010