Vrae oor toelating by Onderstepoort

As ouers van 'n onsuksesvolle veeartseny-kandidaat is ons regtig bekommerd oor die kriteria. Verskeie versoeke na die Universiteit het nie regtig vrugte afgewerp nie...Dit is jammer dat 'n passie vir die beroep en twaalf jaar se BAIE harde werk en UITSTEKENDE prestasies klaarblyklik net eenvoudig nie goed genoeg geag word nie...

Aan al die ongelukkiges: Ek is self 'n veearts en vir langer as 22 jaar reeds in die beroep, was ook vir 'n tydperk in die akademie asook in besluitnemings posisies in die professie en in privaat praktyk. Ek weet dus (ek dink) waarvan ek praat. Net 'n paar menings: Ek voel kandidate moet streng volgens meriete gekeur word, SONDER in agneming van ras, kleur of geslag. (Soos ons sportspanne behoort te wees, as dit dan opeindig om 'n klas vol mans of dames of Swartes of Wittes te wees EN hulle is volgens die korrekte kriteria gekeur, so be it). Skool of universiteitspunte is eerstens van kardinale belang, aangesien dit makliker is om in te kom as om daar uit te kom (te kwalifiseer) en sterk akademiese vermoëns dus noodsaaklik is - ja, veeartsenykunde is een van die moeilikste kursusse op universiteit en tot op hede het akademiese standaarde by Veeartsenykunde nog nie verlaag nie. Inteendeel, eerder verhoog, wat goed is, want dan kry die publiek veeartse van hoogstaande gehalte, selfs beter as toe ek gekwalifiseer het. Indien onderhoude gehou word, behoort dit eintlik "blind" gedoen te word, sodat identiteit, geslag, ras of kleur nie geidentifiseer kan word nie. Alleenlik dan sal keuring onpartydig geskied (met natuurlik akadenmiese prestasie as basis). Vir diegene wat bang is dat die professie oorgeneem sal word deur enige spesifieke ras/kleur ter wille van regstellende aksie, wil ek net noem dat sekere gemeenskappe en kulture nie opgevoed word met diere, veral troeteldiere, as prioriteit nie. Dus stel die meeste van hul kinders nie belang in 'n beroep soos veeartsenykunde nie. Die gevolg is dat daar nooit, of sekerlik nie in baie van ons se leeftyd, genoeg aansoeke uit daardie gemeenskappe sal kom om die getalle demografies of polities korrek te maak nie. Dus, ek glo daar sal altyd plek wees vir kandidate uit sekere gemeenskappe, al is dit net omdat die plekke wat oopgehou word vir sekere ander kandidate, nie gevul sal word nie. Die plekke sal dan net op die tippie gevul moet word en studente wat regtig belangstel sal bereid moet wees om enige tyd so 'n plek op te neem, al sou dit op 'n ongemaklike tyd van die jaar wees. Baie sterkte aan u almal. Dis 'n edele, hoogs gesofistikeerde en gerespekteerde professie. Kom ons hou dit so.

Ek studeer tans by Onderstepoort as 'n verpleegster en wil net graag noem dat die slimste veeartse nie altyd die beste veeartse is nie. Die hoogste punte beteken nie noodwendig dat 'n persoon prakties goed gaan wees nie. Ek persoonlik dink dat onderhoude gevoer moet word sodat die leerlinge wat 'n passie vir diere en genesing het gekies word en nie net die slimste leerlinge nie.

Ek stem saam met Rachelle Steenkamp, en wil ook baie dankie se aan AgriforumJeug, en ek hoop dat hul vir ons behoorlike uitklaring kan gee oor die verskuilde kriteria oor die toelating van studente by die Fakulteit van Veeartsenykunde. My dogter werk al vandat sy 16 is by ‘n Veearts oor naweke en in die week. Sy het net soos Kiara 7 onderskeidings gehad in matriek en is per sms ingelig dat sy nie goedgekeur is vir 2012 nie. Dit was ‘n geweldige skok. Sy het ‘n 100% beurs gehad, wat sy nou verbeur omdat sy nie goedkeuring gekry het nie. Na verskeie oproepe en vrae wat die kriteria is hoe hul gekies word – (en waaraan sy voldoen het aan al die vereistes), is sy nogsteeds afgekeur. En dan wil ek ook net vir jou se “onbekende besoeker”, jy het seker nie ‘n kind wat daardeur geraak word nie, daarom jou opinie sonder om jou naam te noem. Hoekom het hul nie onderhoude gevoer en ekstra toetse eksamens geskryf soos by Argitektuur nie. Ek is seker jul sou dan die koring van die kaf op meriete kon skei.

Die ergste is dat daar ook ten koste van ons eie kinders, plek vir internasionale studente gereserveer word. Hoekom moet hulle plek bo ons plaaslike wit kinders kry? Ek sal graag UP se antwoord hierop wil hoor.