Vrystaat Landbou takel ramphulp

“Daar is blykbaar nie geld om verspoelde paaie en brûe net te herstel nie, en ons kan nie twee of drie jaar wag voor die Regering eers daarmee begin nie.” Dít volgens mnr. Henk Vermeulen, hoofbestuurder van Vrystaat Landbou (VL), na aanleiding van ‘n vergadering wat dié organisasie met verskeie staatsdepartemente in Bloemfontein sal hou.

Vermeulen sê die riviere in die provinsie is nog te hoog om die uitwerking van verlede week se oorstromings te bepaal, maar “daar is groot skade!” Hy sê die VL wil die verskillende departemente aanmoedig om spoedig vir ramphulp aansoek te doen aangesien daar baie skade aan infrastruktuur is wat dringende aandag verg.

Kyk na foto's van die oorstromings:

Ongelooflike foto's van die reën

Tyd vir 'n strategie
Vermeulen sê hy wil so gou as moontlik ‘n strategiese plan saamstel om die probleme aan te spreek en seker te maak dat die regte kanale gevolg word ten einde vinnige en doeltreffende resultate te kry. “Ons het die vergadering gereël, want as iemand dit nie doen nie gaan niemand die ding koördineer nie. Dit terwyl gemeenskappe groot probleme het.”

“Die son het darem al uitgekom, maar daar’s steeds voorspellings van reën in die Oos-Vrystaat wat ons bekommer.” Volgens Vermeulen sal nog reën, selfs tussen 10 mm en 20 mm, tot gevolg hê dat riviere weer afkom aangesien die omgewing se grond baie versadig is.

Ernstige skade
Verskeie riviere was verlede week in vloed, en baie damme se walle het gebreek. Volgens Vermeulen moes baie boere wat hul huise naby riviere opgerig het, ontruim.  Die omgewings van Heilbron, Bethlehem, Frankfort, Kroonstad en Bothaville het erge oorstromings ondervind.

Boere in Harrismith het verlede maand reënval van 500 mm aangeteken, terwyl ‘n boer van Bethlehem vir dieselfde tydperk 400 mm gemeet het. Daar is groot skade aan gesaaides wat versuip of verspoel het. Sommige vee het gevrek weens vrotpootjie en ander het in die riviere verdrink.

Lees ook:

Reën kan waterkrisis veroorsaak

1 Februarie 2010