Vrystaatse boere maak self pad reg

Die patetiese toestand van Vrystaatse paaie is opnuut in die kollig nadat boere van die distrik Hobhouse self die slaggate op die pad tussen Ladybrand en Hobhouse begin regmaak het.

Skade
Die swak toestand van dié pad het reeds groot skade vir boere in die omgewing veroorsaak en tientalle boere is nou besig om saam met hul werkers die pad reg te maak.

Volgens mnr. Hannes Olivier, ’n boer van Hobhouse, het die groep boere die nodige reëlings met die provinsiale departement van paaie en administrasie getref voor hulle aan die werk gespring het.

Boere moes glo onder meer ’n vrywaringsform onderteken voor hulle kon begin om die pad reg te maak, aldus Volksblad. Baie trekkers met sleepwaens vol gruis sal glo ingespan word om die pad weer rybaar en veilig vir gebruikers te kry.

Spoorvervoer
Intussen het boere van die distrik Dealesville ’n vergadering gehou oor die pad tussen Dealesville en Hertzogville wat so te sê onrybaar is.

Volgens dr. Kobus Laubscher, ’n landbou-ekonoom, is die gebrek aan spoorvervoer in die omgewing te blameer vir die verval van die paaie.

“Die gebrek aan behoorlike spoorvervoer noodsaak die toenemende afhanklikheid van padvervoer en die paaie kan eenvoudig nie die verkeer dra nie,” sê hy.

Bron: Volksblad

7 Julie 2011