W

Agri SA het op sy kongres onderneem om die besluite van die Wêreldberaad oor Volhoubare Ontwikkeling te steun en het 'n beroep op die Regering gedoen om uitvoering te gee aan die beraad se implementeringsplan.

Terselfdertyd het Agri SA sy samewerking aangebied om vennootskappe te vorm sodat die doelwitte vir volhoubare ontwikkeling in die strategiese plan vir die landbou bereik kan word. Die organisasie sal ook saamwerk aan die proses om 'n handves vir boere saam te stel.

Mnr. Boeta du Toit van Agri Noordwes het gevra dat voorstelle vir die handves oor die volgende jaar deeglik bestudeer en bespreek word voor uitsluitsel daaroor gegee word.

Mnr. Edward Vorster, voorsitter van Sitrus SA en inleier van die bespreking oor die WVO, het gesê landbou se strategiese belang vir voedselsekerheid en landelike ontwikkeling is in die implementeringsprogram erken en bevestig. Hy sê een van Suid-Afrika se uitdagings met volhoubare benutting loop saam met grondherverdeling, en die uitdaging is om bestaande ontwikkeling in stand te hou.

Hy het gesê van die resultate wat Afrika van die beraad verwag, is globale vennootskappe om ongelykhede en armoede aan te pak, integrering van handels-, finansiële en beleggingsaspekte binne 'n volhoubare ontwikkelingsagenda en spesifieke sektorale ooreenkomste en programme.

Agri SA was ingesluit in die afvaardigings van die Internasionale Federasie van Landbouprodusente wat aan al die voorbereidende vergaderings vir die beraad deelgeneem het.