Wêreld se koring minder

Die internasionale koringvoorrraad vir die jaar word op 174 miljoen ton geskat, wat 12,3 miljoen ton laer is as wat vroeër verwag is.

Dié statistieke is pas deur die Amerikaanse department van landbou in sy internasionale voorraad- en skattingsverslag vir Augustus bekend gemaak.

Luidens die dokument het koringvoorraad vir die 2010/’11 skerp - met 15,3-miljoen ton - verminder. Dit is grootliks te wyte aan laer produksie in verskeie lande.

Rusland en Europa?
Vooruitsigte vir koringproduksie in Rusland is met 8 miljoen ton verlaag weens die droogte waaronder die land gebuk gaan. Erge hitte het tydens Julie en die eerste twee weke van Augustus daar voorgekom, wat koring-oeste verder benadeel het. Kazakstan se produksie word ook 2,5 miljoen ton laer geskat weens die droogte.

(Lees ook Johan van den Berg se jongste weervooruitskouing, waarin hy onder meer aandag gee aan koringproduksie in ander lande. Droogte-knou vir wintergraan.)

Wat die Oekraïne aanbetref, is produksie weens hewige somerreën 3 miljoen ton laer geskat. Produksieverwagtinge vir Algerië, Brasilië, Uruguay, Belarus en Kroasië is ook laer, terwyl effense stygings in Indië, Amerika, Australië en Uzbekistan kan volg.

Invoer en uitvoer?
Skerp dalings word ook ten opsigte van invoer en uitvoer in Rusland verwag. Invoere sal na verwagting 5,7 miljoen ton laer wees as gevolg van hoër pryse wat aanvraag in sommige lande laat daal.  Uitvoere word 12 miljoen ton laer geskat, veral ná die aankondiging dat Rusland sy uitvoer tot Desember 2010 opgeskort het.

Hoër uitvoer word egter in ander lande verwag. Uitvoer in China word 1,2 miljoen ton hoër geskat, met uitvoer vir Australië en die EU-lande wat een miljoen ton meer geskat word. Turkye se uitvoer sal na verwagting 900 000 ton meer wees, en dié van Amerika 5,4 miljoen ton meer.

13 Augustus 2010