Water: Besoedeling kan uitvoer knou

Die besoedeling van Suid-Afrika se riviere, soos die Olifantsrivier, kan voedseluitvoer na Europa in gedrang bring, sê die Nasionale Waterforum.

“Ek is oortuig ons is op die punt waar van die voedsel wat op ons tafels beland, reeds besoedel is. Hoewel die besoedeling van riviere nog nie ‘n wesenlike invloed op voedselproduksie in die land gehad het nie, dink ek ‘n definitiewe moontlikheid bestaan dat dit uitvoer na Europa kan beïnvloed,” sê mnr. Louis Meintjes, voorsitter van die Nasionale Waterforum.

Meintjes sê hy meen die ernstige besoedeling in die Olifantsrivier waaroor onlangs in die Beeld berig is, het ‘n invloed op ekosisteme wat afhanklik is van die rivier.

Luidens die berig in Beeld het wetenskaplikes afgekom op grootskub-geelvis karkasse, wat weens dieselfde siekte (pansteatitis) as krokodille in die rivier gevrek het. Die rivier word beskryf as een van die mees besoedelde riviere in die land. Dit word sedert 2008 deur wetenskaplikes ondersoek aangesien sowat 200 Nylkrokodille die afgelope twee winters in die Olifantsrivierpoort in die Krugerwildtuin gevrek het.

Volgens dr. Paul Oberholster, ‘n varswater-navorser van die WNNR, is dié rivier besoedel deur landbou-werksaamhede, rioolafval, mynbou- en nywerheidsbedrywighede. Die Klipspruit, wat naby Witbank ontspring, word as die mees besoedelde sytak van dié rivier beskryf.

Kan ernstig siek raak
Me. Martella du Preez, ‘n mikrobioloog van die WNNR, waarsku dat mense wat water regstreeks uit die Olifantsrivier gebruik, ernstig siek kan word.

Volgens Meintjes moet spesifieke waterbronne en grond aan die produksie van voedsel in die land afgestaan word om voedselsekerheid te bewerkstellig. “Die waterbronne moet dan gesuiwer word om gesonde voedsel te verbou”.

Hy raai ook aan dat die Departement van Waterwese en Omgewingsake die bronne van besoedeling regstreeks moet aanpak. “Moenie nog studies doen of konferensies hou nie. Maak elke munisipaliteit se rioolaanleg reg sodat rioolstorting kan stop, en stop mynaktiwiteite in gebiede waar water belangrik is vir voedselproduksie. Ons kan nie sê ons wil nóg en nóg myne hê as ons nie kos vir daardie mynwerkers gaan kan voorsien nie,” verduidelik Meintjes.

Meintjes sê dit sal baie ongewens wees as Suid-Afrika ‘n netto-invoerder van voedsel raak. “Mens moenie bakhand staan by ‘n ander land nie, want as hulle mense nie kos het om te eet nie, gaan hulle definitief nie hulle kos vir ons gee nie!”

Bron:

Beeld

28 April 2010