Water: ‘Groot gemors’ op Sannieshof

’n Verslag van die Department van Waterwese het onlangs aangedui dat rioolstorting deur die Tswaing-munisipaliteit in die omgewing van Sannieshof in Noordwes nie die bron van rioolbesoedeling in Barberspan en die Hartsrivier is nie.

Mnr. Molefi Legoetle, munisipale bestuurder, sê die verslag dui aan dat die besoedeling van die pan en rivier van ’n ander oord af kom en dat dít verder ondersoek sal word.

Die verslag dui ook aan dat stortings tussen September en November vanjaar afgeneem het. Daar kom tans glo geen ernstige stortings voor nie. ’n Ekstra dam om rioolwater op te vang, is intussen gebou.

Projek nooit afgehandel
In 1999 het die munisipaliteit glo ’n plan opgetrek waarvolgens riooldamme aangepas sou word sodat die damme se oorloopwater vir besproeiing gebruik kon word. Die pype wat vir die projek nodig is, is egter nooit gelê nie en so het blokkasies oor die afgelope tien jaar in die damme gevorm.  

Die gemeenskap van Sannieshof voer al die afgelope vyf jaar ’n stryd teen die munisipaliteit oor rioolstorting, asook gebrekkige dienslewering ten opsigte van water. Sommige boere het nie meer hul diere se water uit die pan en rivier onttrek nie, omdat dit weens die besoedeling nie meer veilig was nie.

Hulle vrees ook dat van die besoedelde water moontlik na hul boorgate deursyfer. Die gemeenskap het vroeër vanjaar regsaksie oorweeg, hoewel dit later gestaak is omdat die munisipaliteit met die Sannieshof-belastingbetalersvereniging begin saamwerk het.

'n Groot gemors
Me. Carin Visser, regsverteenwoordiger van die belastingbetalersvereniging, sê sy bestudeer tans die inhoud van die verslag noukeurig, aangesien sy nie daarmee saamstem nie. Sy sê daar is sprake dat die rioolbesoedeling van ’n natuurreservaat in die omgewing af kom, maar dit maak nie sin nie. Die storting van riool in Itsoseng en Schweizer-Renecke steeds voort, sê sy.

“Ek het vyf jaar van my lewe vir dié saak om baklei, en ek weet nie of dit meer die moeite werd is nie”. Sy sê die munisipaliteit self het glo nie geld om die water te monitor nie en die gemeenskap betaal die afgelope paar maande vir twee weeklikse moniterings om te bepaal of die water steeds skoon is. Die munisipaliteit is egter vir dié monitering verantwoordelik.

“Alles is net een groot gemors.” Visser sê dit lyk of die munisipaliteit se foute deur die Department van Waterwese toegesmeer word.

17 Desember 2009