Weermagbrug vir rampgebied?

'n Brug van die SA Nasionale Weermag kan dalk by De Doorns in die Wes-Kaap, wat deur vloede geteister was, opgerig word om tydelike oorgang te bied.

Die Breederiviervallei en die Overbergstreek, waar boere verlede jaar erg onder die vloede deurgeloop het, is nog nie tot rampgebied verklaar nie.

Die departement van landbou in die Wes-Kaap het sover alles wat moontlik is gedoen om boere in die gebied by te staan totdat geldelike hulp hulle bereik. Die departement het met die landbougemeenskap saamgespan en nege van die elf brûe herstel wat verlede jaar vernietig was.

Omdat hierdie provinsiale brûe is, is dit die verantwoordelikheid van die Wes-Kaapse departement van vervoer en openbare werke om toe te sien dat dit herstel word.

Mnr. Cobus Dowry, Wes-Kaapse LUR vir landbou, sê raadgewende ingenieurs beplan en ontwerp reeds die brug by Orchard. Bouwerk aan die brug sal teen die middel van die jaar afskop. Die aanloop van die brug by De Doorns moet ook herstel word.

Om tydelik oorgangsprobleme op te los, het die departement die moontlikheid oorweeg om die alluminiumbrûe van die weermag in te span. Dié soort brûe word nie net wêreldwyd in oorlogsituasies gebruik nie, maar kan ook in noodverligtingsituasies aangewend word.

Dowry sê die SAW het personeel na die gebied gestuur om 'n evaluering van die situasie te doen.

Hierna het die SANW die kosteberaming vir die vervoer en opstel van twee alluminiumbrûe aan die departement verskaf. Die departement kon dit egter nie in sy begroting akkommodeer nie.

Landbouweekblad verneem dat die koste meer as R5 miljoen beloop. Die weermag kan die brûe ook net vir vier maande beskikbaar stel, want dan moet dit vir enige skade ondersoek word. Omdat dit van aluminium is, sal dit ook dag en nag opgepas moet word om te voorkom dat diewe dit stuk-vir-stuk wegdra.

22 Januarie 2009