Werktuie verkoop goed

Die 267 trekkers wat in Desember verkoop is, was 27 % meer as die 211 wat dieselfde tyd 'n jaar gelede verkoop is. Die 4 428 eenhede wat verlede jaar verkoop is, was 56 % meer as in 2001.

Die 182 stropers wat verlede jaar verkoop is, was 84 % meer as die vorige jaar. Min balers is in Desember verkoop en die totale getal balers wat verkoop is, was effens laer as in die vorige jaar.

Mnr. Bert Pepler, voorsitter van die SA Landboumasjinerievereniging sê stroperverkope was goed danksy die goeie koringoes, veral in die Wes-Kaap. Die verkope van balers is gestrem deur die geweldige hitte en swak reënval in die gebiede waar gewoonlik heelwat hooi gemaak word.

Die laat reën het kopers onrustig gemaak en die verwagting is dat die stygende neiging in die verkope van landbouwerktuie waarskynlik nie sal voortduur nie.

17 Januarie 2003