Wes-Kaap begroot vir rampe

’n Begrotingsaanpassing deur die Wes-Kaapse departement van landbou het toegang tot ’n ekstra R94,861 miljoen tot gevolg. Die meeste van dié geld sal vir ramphulp aangewend word in dele van die provinsie wat onder droogte en oorstromings gebuk gaan, sê mnr. Gerrit van Rensburg, provinsiale minister van landbou.

Altesame R50 miljoen is toegeken vir ramphulp aan boere in die Kaapse Wynland, die Overberg en die Eden-distrik weens verlede jaar se oorstromings, terwyl R26,9 miljoen vir droogtehulp in die Sentrale Karoo opsygesit is.

Luidens ’n mediaverklaring van die departement is R7,88 miljoen oorgedra van die oorspronklike ramphulp van R9 miljoen vir verlede jaar en vanjaar se oorstromings aan die Weskus, terwyl R5,89 miljoen van die oorspronklike R33 miljoen oorgedra is vir steun ná die oorstromings in die Eden-distrik in 2006.

7 Desember 2009