Wes-Kaap, Boergondi

Samewerking tussen die Wes-Kaap en die Franse provinsie Boergondië hou groot voordele vir landbou in die Wes-Kaap in, sê mnr. Marthinus van Schalkwyk, premier van die Wes-Kaap.

Hy het aangekondig dat 'n formele ondereenkoms tussen die twee provinsies op 12 September in Dijon, Boergondië, onderteken sal word. Dié ooreenkoms sal drie jaar geld en waarskynlik vir nog drie jaar verleng word.

"Omdat Boergondië deur heelwat mense as die vernaamste wynstreek in Frankryk en een van die belangrikste wynstreke in die wêreld beskou word, glo ons die Wes-Kaap, die vernaamste wynstreek in Suider-Afrika, sal deur dié samewerking bevoordeel word. Dit geld veral opleiding, die uitruil van kundigheid, gehaltestandaarde in die landbou, produksie van gehaltevoedsel en die toevoeging van waarde tot basiese landbouprodukte," sê mnr. Van Schalkwyk.

Samewerking sal gemik word op die uitruil van studente en onderwysers by opleidingsentrums, gesamentlike opleiding, die uitruil van hoërskoolleerlinge en uitruilaksies tussen navorsers, laboratoriums en universiteite.

Hoewel die ooreenkoms op die landbou (en wyn in die besonder) fokus, sal heelwat aandag ook aan ekonomiese ontwikkeling gegee word.

Mnr. Van Schalkwyk sal op sy besoek aan Boergondië deur onder meer mnr. Johan Gelderblom, provinsiale LUR van landbou, toerisme en dobbelary en lede van die provinsiale wetgewer se staande komitee vir die landbou vergesel word.

13 September 2002