Wildbedryf help ekonomie stu

Die wildbedryf word toenemend ‘n belangrike pilaar van die land se ekonomiese ontwikkeling, wat ook maatskaplike en kulturele kwessies kan bevorder, luidens navorsing deur die Noordwes Universiteit (NWU).

Luidens ‘n berig op Business Day sê prof. Melville Saayman, ‘n NWU-kundige in toerisme-ekonomie, dat dié studie die ongunstige aannames oor die bedryf se uitwerking op wildboerdery, werksgeleenthede en ekonomiese groei ongeldig verklaar.

Sowat 20,5-miljoen ha grond word tans vir die wildbedryf en -bewaring in Suid-Afrika aangewend, terwyl die kommersiële landbou op sowat 72,6 miljoen hektaar plaasvind. Wat belangstelling aanbetref, neem sowat 200 000 mense in die land aan jag-bedrywighede vir ontspanning deel.

Gevallestudie in die Noord-Kaap
In ‘n opname om vas te stel hoeveel dié bedryf tot die provinsiale en die nasionale ekonomieë bydra, is op ‘n onlangse gevallestudie op die Noord-Kaap gefokus. Volgens die syfers van die provinsie se 2007/’08 boekjaar, het dié bedryf sowat R774,2 miljoen bygedra. Sowat 5 180 werksgeleenthede bestaan in dié sektor in die provinsie.

Die Noord-Kaapse jagbedryf bied 11 972 beddens, met ‘n gemiddelde gebruik van 48% per bed deur jagters en toeriste. Dit is sowat 10% laer as die algemene norm in die land. Derhalwe meen Saayman die Regering moet die bedryf baie meer bemark en ondersteun. “Die sektor skep werk en dit dra by tot landelike ontwikkeling.”

Bron: Business Day

18 Junie 2010