Wisselkoers kan help én knou

Die wisselkoers wat die rand teenoor die dollar handhaaf, is goeie en slegte nuus vir die landboubedryf, sê mnr. Tony Twine, ’n ekonoom van die Econometrix-groep.

Met die rand wat Vrydagoggend (23 September 2011) op R8,41 teenoor die dollar was, meen Twine dat uitvoerders en uitvoerprodusente ’n ruk lank verligting kan verwag.

“Dit beteken egter nie alles is nou klopdisselboom nie, want dié wisselkoers gaan hulle op ander plekke byt,” sê Twine. Die wisselkoers is ’n teken dat die wêreldekonomie weer ’n afswaai beleef. Twine meen dit kan op sy beurt weer daartoe lei dat Suid-Afrika uitvoergeleenthede inboet.

’n Vlak van R7,50
Twine sê die verswakking van die rand is ’n regstreekse gevolg van die invloed van gebeure in Amerika en Europa op die plaaslike ekonomie. Hy meen dat die rand nou uit sy lae vlakke teenoor die dollar beweeg het, en dat dít tot aan die einde van 2012 sal voortduur.

“Die laagste vlakke vir die volgende 14 of wat maande sal rondom R7,50 wees.”

Volgens dit wat ekonome uit die afgelope drie jaar se gebeure kan aflei, meen Twine dat indien Suid-Afrika ’n tweede resessie beleef, dit ten minste nege maande sal duur.

Brandstofpryse
Vir die komende maande voorspel Twine aansienlike stygings in brandstofpryse, buiten as die internasionale olieprys daal.

“Gegrond op gister (Donderdag, 22 September 2011) se pryse word ‘n petrolprysstyging van 36c per liter en ‘n dieselprysstyging van 38c per liter op 5 Oktober 2011 verwag.”

As die internasionale olieprys op sy huidige vlakke van rondom $108 per vat bly beweeg of styg, verwag Twine ’n verdere styging van sowat 20c per liter in brandstofpryse in November.

“As die olieprys egter deur dié vlak breek en sê tot op $103 per vat daal, kan dit effense verligting vir brandstofverbruikers beteken.”

23 September 2011