W.Kaap sal glo die meeste koring lewer

'n Koringoes van 2 298 100 ton word volgens die eerste skatting van wintergraan deur die Nasionale Oesskattingskomitee dié seisoen verwag. Dit is effens minder as die vorige oes van 2 492 880 ton.

Die komitee het ook die oppervlakte onder koring aangepas van 959 400 ha tot 935 100 ha.
Die Wes-Kaap sal vanjaar waarskynlik die grootste oes lewer met 874 000 ton, wat amper 43 000 ton meer is as dié van die vorige oes. Boere daar het ook meer geplant, naamlik 380 000 ha teenoor 374 000 ha die vorige jaar.
Hierteenoor het Vrystaatse boere dié seisoen heelwat minder koring geplant as in die vorige seisoen. Volgens die komitee se hersiene oppervlakteskatting, is net 427 000 ha geplant teenoor 450 000 ha die vorige seisoen. Dié provinsie se koringoes in die huidige seisoen word op 789 950 ton geskat, wat heelwat minder is as die vorige seisoen se oes van 1 035 000 ton.
Volgens die eerste skatting van die garsoes word 'n oes van 178 810 ton verwag, wat meer is as die 156 751 ton wat die vorige seisoen afgehaal is, terwyl die oppervlakte onder gars van 79 190 ha tot 73 400 ha aangepas is.
'n Heelwat groter kanola-oes van 42 850 ton word verwag. Verlede seisoen is 'n oes van net 25 750 ton afgehaal.
Die komitee skat die soetlupine-oes op 12 000 ton. Dit is heelwat minder as die vorige oes van 16 338 ton.
Volgens die finale skatting vir somergewasse is daar geen verskil in enige van die gewasse se verwagte opbrengste nie.
Die mielie-oes word op 8 781 480 ton geskat, die sorghumoes op 197 275 ton, die grondbone-oes op 120 185 ton, die sonneblomsaadoes op 840 040 ton, die sojaboonoes op 202 398 ton en die droëbone-oes op 59 020 ton.
30 Augustus 2002