Wolmark steeds sterk

Die wolmark het op dié week se veiling effens hoër gesluit en Cape Wools se Merino-aanwyser het met 0,5% tot R103,01/kg (skoonwol) gestyg.

Die mark het stewig vertoon ondanks ’n sterker rand, wat met 2,1% teenoor die Amerikaanse dollar verstewig het vergeleke met die vorige week se gemiddelde koers.

Met wolproduksie in al vyf die belangrikste uitvoerlande op die laagste vlakke in dekades, word die mark op die oomblik hoofsaaklik deur vrese vir woltekorte aangevuur.

Hierdie week se aanbod was redelik klein met net 6 180 bale waarvan 96% verkoop is.  Vetwoluitvoerders was die grootste kopers.

Vagwol van gehalte het weer goed verkoop, hoewel die pryse van wol van 19 mikron en fyner effens teruggesak het. Die sterker tipes het prysstygings getoon met die grootste styging in die kategorieë 20 en 21 mikron.

Die gemiddelde skoonwolpryse van lang, kamwoltipes (MF5) van gehalte was soos volg: 19 mikron verswak met 1,7% tot R117,95/kg, 20 mikron was 2,1% duurder op R110,95/kg, 21 mikron verstewig met 1,8% tot R106,18/kg en 22 mikron styg met ’n marginale 0,3% tot R104,99/kg.
Sowat 9 500 bale sal volgende week aangebied word.

2 Februarie 2012