Wolnavorsing in W.Kaap nou produsent-gedrewe

Ledegeld vir die Wes-Kaapse NWKV sal voortaan steeds 0,15 % van die bruto-skeerselrealisasie beloop, maar die produksieplafon van 8 000 kg verdwyn. Dit is om meer geld vir wolnavorsing beskikbaar te stel.

Dié besluit is eenparig op die jaarvergadering van die Wes-Kaapse tak van die NWKV op Elsenburg aanvaar.

Mnr. Philipus Swart van die Jongensklip Boerevereniging van Riviersonderend, het gesê dit beteken bloot dat die produksieplafon geskrap word. Bedryfsgeld in wolskaap-navorsing is te min en die wolbedryf verloor navorsers aan ander bedrywe wat meer geld vir navorsing beskikbaar stel. Dit veroorsaak dat tegnologie ophou ontwikkel en internasionale skakeling taan.

Op dié manier kan wolboere van die Wes-Kaap regstreeks betrokke raak met die finansiering van navorsing en ontwikkeling om waarde tot die wolbedryf te voeg. Só word die bedryf in staat gestel om tegnologiese ontwikkeling aan te moedig terwyl die eienaarskap van sulke ontwikkeling deur die bedryf behou word.

Mnr. Swart het gesê 'n navorsingstrust sal gestig word wat deur 'n navorsingskomitee van die NWKV bestuur sal word. Dié komitee sal toesien dat navorsing doelgerig en binne begrotings gedoen word.

Alle wolskaap-gerigte navorsingsprogramme in die Wes-Kaap, asook dié wat in ander provinsies namens die Wes-Kaap gedoen word, sal in die toekoms produsente-gedrewe wees, het hy gesê.

'n Vyf-jaar navorsingsplan sal ook in werking gestel word en behoeftebepalings sal op 'n jaarlikse basis plaasvind. Navorsingsresultate sal op gereelde basis bekend gemaak word, is besluit.