Wolpryse effens stewiger

Wolpryse was ietwat stewiger op verlede week se veiling te midde van 'n goeie vraag uit alle sektore van die handel. Cape Wools se aanwyser het 0,6 % hoër op R42,02/kg (skoon) gesluit.

Hoewel die marksentiment gunstig is, sê kopers dit raak moeiliker om huidige pryse verder in die pyplyn deur te gee omdat talle spinners en wewers weerstand teen die hoë prysvlakke bied. Die kleiner aanbiedings, wat duidelik op veilings in die woluitvoerlande waarneembaar is, ondersteun egter die mark. Kambolmakers is baie aktief.

Ontleders verwag dat die huidige prysvlakke op kort termyn gehandhaaf sal word, maar waarsku dat markte in die algemeen senuagtig is in die lig van onsekerheid oor gebeure in die Midde-Ooste en 'n moontlike aanval op Irak, wat verbruikersvertroue benadel.

Altesame 7 260 bale is aangebied, waarvan 96 % verkoop is.

Gemiddelde prysbewegings was: 19 mikron daal met 0,2 % tot R61,84/kg, 20 mikron met 0,3 % tot R60,37/kg, 21 mikron styg met 0,8 % tot R59,99/kg, 22 mikron met 0,9 % tot R59,64/kg, 23 mikron met 0,2 % tot R59,01/kg, 24 mikron met 0,5 % tot R58,71/kg en 25 mikron daal met 1 % tot R56,57/kg.