Die wolmark het op gister se veiling verstewig danksy ’n swakker rand en Cape Wools se Merino-aanwyser het met 2,6% gestyg tot R61,54 (skoonwol).

Die rand het met 2,7% verswak teenoor die wisselkoers van die vorige veiling, twee weke gelede, wat die mark ondersteun het en bokant die sleutelvlak van R60/kg gehou het.

Daar was ook goeie vraag na langwol, wat veroorsaak het dat die pryse van sommige van die langwoltipes met tot 4,6% gestyg het.

Altesame 8 842 bale is aangebied waarvan 98% verkoop is.

Die gemiddelde pryse van lang, kamwoltipes (MF5) van gehalte (minder as 1% saadinhoud) was soos volg: 19 mikron was onveranderd op R68,75/ kg; 20 mikron styg met 4,5% tot R65,25/kg; 21 mikron was 1,6% duurder op R62,40/kg en 22 mikron verbeter met 6,6% tot R62,72/kg.

Veilings hervat weer op 12 Mei wanneer sowat 8 000 bale aangebied sal word.

29 April 2010