Wolskaap kan armes help

Die veebedryf het die potensiaal om landelike gemeenskappe uit armoede te lig. Veral die wolskaap het hom reeds bewys as voertuig om dié ideaal te bereik.

Mev. Olivia Sigidi van Idutywa in die voormalige Transkei het gesê die produktiwiteit in die veebedryf in die kommunale gebiede is tans ver onder sy potensiaal. Hoewel 40% van die provinsie se wolskape, 60% van die beeste en 60% van bokke in die Oos-Kaapse kommunale gebiede voorkom, is dié gebiede se markaandeel minder as 5%.

"Dit is duidelik dat 'n belegging in dié bedryf ongekende moontlikhede inhou vir mense in kommunale gebiede om hul inkomste te verhoog. Aangesien vee oor die hele voormalige Transkei en Ciskei voorkom en 'n lae insetkoste verg, kan ingryping in die bestaande produksiestelsels in dié gebiede merkwaardige verbetering in produktiwiteit en winsgewendheid meebring," het sy gesê.

Sy het gesê wolprodusente in die kommunale gebiede is reeds uitstekend georganiseer. Meer as 4 000 is betaalde lede van die NWKV, hulle dien in die bestuur van dié vereniging, die Woltrust, Cape Wools en die Wolforum. "Ons neem volle verantwoordelikheid vir ons toekoms."

Sy het met lof gepraat van die geïntegreerde produksiestelsels van die NWKV en die Regering en gesê die uitwerking op die gebied was ongelooflik. Die topskeerhokke se inkomste het in vier jaar van R17 000 tot R209 000 gestyg. "Dit het ons oë oopgemaak vir die potensiaal in ons gebied."

Me. Sigidi het haar waardering uitgespreek teenoor die Oos-Kaapse LUR van landbou, mnr. Max Mamase, vir die R3,9 miljoen wat vir die verbetering van skaapkuddes beskikbaar gestel is. "Ons sal u nie teleurstel nie. Ons is oortuig beeste en bokke sal volg namate ons skaapboerdery baasgeraak het."

Sy het gevra vir deurlopende finansiering vir hierdie projekte en het infrastruktuur, opleiding en voorligting en verbeterde genetiese materiaal, die ramteelprojek, veldbestuur, heinings en die herstel van uitgetrapte veld as voorkeursake uitgelig.

27 Junie 2002