Wyndruiwe-oes dalk effe kleiner

Vanjaar se wyndruiwe-oes word volgens die bedryf se jongste oesskatting op 1 138 192 ton beraam. Dit is 5,5 % groter as verlede jaar se oes. Na verwagting sal vanjaar se wynoes (sap en konsentraat vir nie-alkoholiese doeleindes, rabat- en distilleerwyn ingesluit) 874,1 miljoen liter beloop.

Dit is bereken teen 'n gemiddelde verhaling van 768 liter per ton druiwe en is 31,6 miljoen liter (3,5 %) minder as die skatting op 10 Januarie vanjaar.

Die rede vir dié afname word toegeskryf aan ligter trosmassas en die hitte wat in Januarie en die eerste helfte van Februarie voorgekom het. Die hoogste afname word in die Oranjerivier-streek verwag. Die hoofredes hiervoor is die uiters gunstige temperatuur vir die maak van rosyne en die laer as verwagte sultana-oes.

Temperature was die afgelope drie weke baie hoog in al die wynstreke. Veral droëlandwingerde kry swaar. Die wingerde en druiwe is egter baie gesond en die oesgehalte is uitstekend.

Die binnelandse verkope van natuurlike wyn vir verlede jaar het 'n styging van 1,4 % teenoor 2001 getoon. Die uitvoer van natuurlike wyn vir die ooreenstemmende tydperke het met 20,7 % gegroei. Brandewynverkope het verlede jaar 'n styging van 0,7 % getoon vergeleke met 2001.

Bogenoemde, tesame met 'n beraamde groter markbehoefte aan rabat- en distilleerwyn, het tot gevolg dat die voorraadvlak op 31 Desember vanjaar by koöperasies en kelders na beraming 190,3 miljoen liter sal wees, vergeleke met 221,5 miljoen liter op 31 Desember verlede jaar.