Wynmakers verwelkom toetse

Wynmakers wat Landbouweekblad om kommentaar oor die voorgenome toetsing van Sauvignon blanc-sap en wyn vir onwettige geurmiddels genader het, verwelkom die toetse en hoop dit sal die gerugte wat die afgelope maande die ronde gedoen het, die nek inslaan.

"Dis hoog tyd. Vir die integriteit van die wynbedryf is dit die beste ding om te doen," sê mnr. Martin Moore, wynmaker van Durbanville Hills.

Hy sê hy hoop hulle vang iemand, want uiteindelik is die situasie sleg vir almal. "Toe dit verlede jaar in Engeland in die nuus was, was alle Suid-Afrikaanse Sauvignon blancs verdag."

Moore sê hy weet nie in watter stadium geurmiddels bygegooi word nie, en hoop die inspekteurs volg die druiwe uit die wingerd om seker te maak hulle vang die skuldiges. Die natuurlike pirasienvlakke by Durbanville is baie hoog en kan amper as verwysing gebruik word.

Mnr. Bartho Eksteen, wynmaker van Bartho Eksteen Wines, Hermanus, sê hoewel die probleem nie so omvangryk is soos wat baie mense dink nie, is daar beslis mense wat hulle daaraan skuldig maak.

"Sauvignon blanc het mos 'n handelsmerk geword, iets waarmee almal kan geld maak, nou plant hulle dit waar hulle nie moet nie. Dié mense moet uitgevang word."

Eksteen stel swaar strawwe vir oortreders voor. "Die raad moet sommer die skuldiges se totale sertifisering opskort. Hulle moet voel dis onwettig, want ons wat wyn natuurlik maak, ly onder hulle."

Ook mnr. Jeff Grier, wynmaker van Villiera, Koelenhof, is ten gunste van die toetsing, maar meen dat dit oral in die wêreld gedoen behoort te word.

Mense wat dit doen, behoort aan die pen te ry. Met toetsing slaan die Wyn- en Spiritualieëraad die regte rigting in omdat dit kan help om gevaarlike gerugte wat die hele bedryf benadeel, uit die weg te ruim.