Wyntoerisme kry hupstoot

Die Olifantsrivier Wynroete en Matzikama Toerismevereniging gaan voortaan kragte saamsnoer om die Olifantsriviervallei en omstreke en sy landbouprodukte aan die wêreld bekend te stel.

Dié samewerking sal beamptes in staat stel om voornemende besoekers in te lig oor alle aspekte van hul reis. 'n Gesamentlike kantoor is op Vredendal geopen. Met dié gedeelde geriewe en personeel is die kantoor nou voltyds en ook Saterdae oop, sê me. Sereza Kersop, skakelbeampte van die Olifantsrivier Wynroete.

Die nuwe Olifantsrivier Wynroete sal dié wynstreek bekend stel as 'n unieke bestemming vir wyntoeriste. Die groot kelders, WestCorp Internasionaal, Lutzville Wingerde en Stellar Organic Wine Cellars, speel die leidende rol in die nuwe benadering. Etlike private wynmakers, insluitend Stoumann's, Gené Wines, Rosslo, Vleiland Wyne, Cape Rock Wines, Wilgenhof, Oubenheim-wynlandgoed, Fryers Cove Wingerde, Matzikama Kelders, Altona en Teubes Wyne, is ook by die vernuwing betrokke.

Die meeste van die streek se wyn word uitgevoer en onder internasionale handelsmerke bemark. Die streek bied ook 'n verskeidenheid boetiekwyne.

By die bekendstelling van die nuwe kantore van die wynroete het mnr. Jannie Mostert, voorsitter van die Olifantsrivier Wynroete, gesê die Olifantsrivierstreek is die grootste wynuitvoerstreek in die land, maar dat dit nie so bekend is by die publiek nie.

Hy meen die wynroete sal van krag tot krag gaan namate samewerking met ander toerisme-organisasies en toeroperateurs plaasvind en gesamentlike promosies gedoen word.